2 JOHANE Johanem dis tcgãyas cám̀ di sa

Téé-cookg'ai sa

Johane ba kò ncẽes tcgãyas cám̀ di sa kaiam kerekes dim iise góáa hãa, a ba a kò “ncam-ncamsas khóè sa hẽé naka cóáa sa hẽéthẽé” góá máá sia hãa – si ko ncẽe sa kereke sa hẽé naka gaas kerekes di khóèan hẽéthẽé nxàe.

Johane ba ko ncẽes kerekes di ne khóè ne ntcàm, ncàm̀ku ne gha sa, a ba a ko tshúù-ntcõa di xu xgaa-xgaa-kg'ao xu koe q'ãa-q'ãa ne.

Tcgãyas q'oo koe hàna zi:

- Ncàm̀kuan di xòèa ne(1-6)- Tshúù-ntcõan di xgaa-xgaan ka dqàèku sa(7-13)

2 John

Tsgám̀kaguku zi

1 Kerekes dir kaia ra a,

a koncẽes tcgãya sa khóès ^{▼▼1:1khóè sa hẽé naka gas di cóán hẽéthẽé e -ncẽe sa ko kereke sa hẽé naka kerekes di ne khóè ne hẽéthẽé nxàe.} nxárá tcg'òóèa hãa sa hẽé naka gas di cóán hẽéthẽé góá máá, ncẽer tseeguan kaga ncàm̀a hãa sa; tíí ka cúí ncàm̀mè tama sa, igabaga thẽé wèé ne ncẽe tseeguan q'ana hãa ne ka ncàm̀mèa hãa sa, 2 tseeguan ncẽe gatáwèé ta ta koe hãa, a i a gha gatá koe chõò tamase hãa domkar ko máá:

3 Nqarim Abo ba hẽé naka Gam ka Cóásem Jeso Kreste ba hẽéthẽé tsara koe guua hãa cgóm̀kuan hẽé naka thõò-xama-máákuan hẽé naka tòókuan hẽéthẽé méé i gatá koe tseeguan hẽé naka ncàm̀kuan hẽéthẽé cgoa hãa, témé.

Tseegu sa hẽé naka ncàm̀ku sa hẽéthẽé e

4 Eẽr ko kóḿ, sari cóán ^{▼▼1:4sari cóán -ncẽe sa ko kerekes di ne khóè ne nxàe.} c'ẽea ko tseeguan xùri sa, ẽem kò ma Abo ba ma x'áèa hãa khamaga ma, kar kò kaisase qãè-tcao. 5 Ra ko ncẽeska khóè seè, dtcàrà tu u, ncàm̀ku méé ta sa. Ka̱bam x'áè-kg'áḿ bar góá máá tu u tama, igabagar ko ncìím x'áè-kg'áḿ ba góá máá tu u, ncẽe ta kò tshoa-tshoases koe ga úúa hãa ba. 6 Si ncàm̀ku sa ncẽe si i: Gam di x'áè-kg'áḿan cgoa ta gha kg'õè si i. Ncẽe tu kò tshoa-tshoases koe ga guu a kóḿa hãa me ko x'áè-kg'áḿ ba máá,ncàm̀kuan cgoa méé tu hãa, témé khamaga ma.

Tshúù-ntcõan di xgaa-xgaan dis dqàèku sa

7 Káí xu qàe-qaeku-kg'ao xua nqõómkg'ai koe síía hãa khama, ncẽe kò Jeso Kreste ba cgàam koe guua hãas ka nxàea tseegukagu tama xu. Gatà ii xu khóè xua qàe-qaeku-kg'ao xu u, a xu a Krestem di xu ntcoe-kg'ao xu u. 8 Gaa domka méé tu q'õésea hãa, naka tua gha táá ẽe xae kúrúa hãa tsééan ka aaguse cgaeè guu, naka tua gha nxãasega cg'oèase surutaè.

9 Dìím wèém ẽe Krestem di xgaa-xgaan qgóóa qari tama, igabaga ko càùa mááse e ba Nqari ba úú tama. Igaba dìím wèém ẽe ko Krestem di xgaa-xgaan qgóóa qari ba, Abo ba hẽé naka Cóásem ga ba hẽéthẽé úúa hãa. 10 Ncẽè c'ẽem khóèm kò ko hàà cgae tu u, a ncẽe xgaa-xgaan xgaa-xgaa tu u tama ne méé tu táá kgoara máá me nakam nquua tu q'oo koe tcãà guu, kana qãèse hààkagu me guu ^{▼▼1:10qãèse hààkagu me guu -Gerika sa ko máá, “tsgám̀kagu me guu,” témé.}. 11 Dìím wèém ẽe ko qãèse hààkagu me ba ko gam di zi tséé zi cg'ãè zi koe tsééa xg'ae cgoa me ke.

Còo di zi tsgám̀kaguku zi

12 Káí zi gúù zir úúa hãa, gazi kar ga góá máá tu u zi, igabagar tcgãya ba hẽé naka góá hìi ba ^{▼▼1:12góá hìi ba -Gerika sa ko c'ẽem kg'ui ba tséékagu ncẽe ko máá, tcgáù cgoa di gúùan ntcùú u.} hẽéthẽér ga tséékagu sa tc'ẽe tama. Igabagar nqòòan úúa hãa, dàra tu ur gha ta síí xg'ae a chóà di i, nxãasega ta gha cg'oèase qãè-tcao ka.

13 Sáá kíís nxárá tcg'òóèa hãas di ne cóá nea ^{▼▼1:13Sáá kíís di ne cóá ne -ncẽe sa ko Johanem dis kereke sa hẽé naka gas di ne khóè ne hẽéthẽé nxàe.} ko tsgám̀kagu si.